1. Skip to Menu
  2. Skip to Content
  3. Skip to Footer

LEA TEFITO (KEYNOTE SPEECH) 'O E FAKA'ALI'ALI 'INASI 'A VISESIO SIASAU FAI 'E PALOFESA SIOSIUA LAFITANI

22089803 1933354230262266 7133888339878353327 nLEA MO E MALANGA TEFITO HE FAKA’ALI’ALI TUFUNGA TAVALIVALI KUPESI ‘A VISESIO SIASAU ‘O TONGA-‘AOLOA NU’USILA MO E ‘UNIVESITI LO’AU, SENITA ANGA FAKAFONUA ‘A TONGA, TOFOA, NUKU’ALOFA, FALAITE 29 ‘O SEPITEMA 2017. 

FAKATAPU:

Tapu ki he matalalava mo e matafe'unu 'o e ‘Fatufatu Fala Fai ki Falelalava’ ‘o e Ta’emakaulea


Tulou ki he koka fonofono koula ‘oku aoniu mo to’ofufu ‘a Kauhala’uta mo Kauhalalalo


Kia Ma’afu Lele mo Ma’afu Toka he Vakamahinahopo mo e Vakato’angaela’a


Ki he Kelekele ‘o Sina’e Kauhala’uta mo Ha’a Havea Lahi ‘oku felalavai ai ‘a e Fale mo e ‘Api Anga Fakafonua ni


Ki he ‘Eiki Fakafe Fakalangilangi ‘o e ‘Aho, ‘Eiki Nopele Vaea ‘o Houma ko e Sea Komiti Talafakafonua 'Ene 'Afio, mo hou’eiki

Talafekau Lahi ‘Aoloa Nu’usila Sarah Walsh, Patele Nailoni Mafi mo e Kau Taki Lotu, Kau Fakaafe Fakalangilangi, Kainga kotoa ‘oku tefua mo me’a mai he peauongo mo e ‘atalea vahaope

Kae’uma’a si’i laumalie ‘o Ha’a Punake, Ha’a Tufunga mo Nimame’a mei ono’aho ki onopo mo onoha’u


FAKA’APA’APA:

Faka’apa’apa kia Visesio Siasau ‘o ‘Asau, Fungamisi, Falaleu, Ha’ano, Ala Folau Heavula mo e Tu’ulatala, ka kuo nofo faifatongia he kelekele ‘o ‘Eiki Nopele Fielakepa mo Ha’a Havealahi. Pehe ki hono hoa ‘ofeina Serene Tay. ‘Oku ako toketa filosefa ‘a Siasau he ‘Univesiti Lo’au ‘oku mau fakakaungatamai ai. ‘Oku ou fiefia he ko e Maa’imoa ni ‘a Ha’a Moheofo, mo e Faka’ali’ali ‘a Hou’eiki, ‘Eiki Palemia, Fonua, pehe ki Tahi Moana mo Tafatafalangi.

‘INASI

Puipuiange he kau to’o hifo e, ka e hao atu he ‘a e fakahoha’a ni. Ko ha talanoa mo e malanga felave’i mo e pelepelengesi ‘o e ouau toputapu mo e angafai fakaehau ‘a Ha’a Tu’i mei ono’aho, ‘a ia ko e KATOANGA ‘INASI.
‘Oku ‘uhinga ‘a e KATOANGA NI kiate au,


Ko ha feilaulau fakahoifua ‘a e lotu mo e faka’ali’ali fakafonua ‘a e Ha’a mo e Kainga ki ha Tu’i ‘aki hano polopolo ‘a e fuatapu lelei, tolonga mo faka’ofo’ofa taupotu taha, ‘a ia ‘oku fungani’aki ‘a e vaemanava he va ‘o e kakai, kelekele, moana mo e vavaloa.


Ne kamata ‘a e ouau ‘INASI ‘o tu’otaha he ta’u, fakafuofua mei he Tu’i Tonga Hongofulu ko Momo, pea liliu kimui fakafuofua he senituli 17 ‘o fai tu’o ua he ta’u. ‘O makatu’unga he’etau Lau Mahina mo e Lau La’a, pe Lau Faha’ita’u mo e Vavaloa. Ko ha katoanga toputapu mo fakaehau ‘a e Tu’i Tonga, mo fakalotu, ke tanaki mai ai ‘a e polopolo ‘o e fuatapu mei hono Pule’angahau ‘o foaki pea vahe ke tofuhia. Na’e fou ‘eni he FEILAULAU FAKAHOIFUA, ‘a ia ko e mafutefua e Tonga. Ne fakamu’omu’a ‘enau li’oa ki he fonua he’enau fiema’u mo e mo’ui, ko ha salusalu ‘o e ‘OSIKIAVELENGA. ‘A ia ne hanga he ‘INASI ‘o fakatauelangi ‘enau faifatonga mo e ngafa.
Kuo hanga he Faka’ali’ali ni ‘o folaloa ha ngaahi tufungaola mo e nimamea’aola ‘oku masani mo ‘asini’asini, ko ha tukutukulaumea lelei mo tolonga taha ki he sivilaise. He’ikai ha me’a lelei ‘e ta’etolonga, pea he’ikai ha me’a tolonga ‘e ta’elelei. Kuo tolonga mai e ngaahi kupesi mei tuai ‘i he’etau kulo’umea, lalava, ngatu, fala, tatatau, tatongitongi, ta’ata pe toto, mo e vavaloa.
‘A ia ne vaka mai he Ngaahi Ha’a, pea ko e kupesi ko e mata’ikoloa ‘a e Ha’a mei he kuohili, hange ko e Fata-‘oe-Tu’i Tonga mo e Humu mei Kauhala’uta, Tokelau Feletoa mei Ha’a Ngatatupu, Kauikalilo mei Ha’a Havea mo e Halapaini, Lupe mo e Sila ‘o Tonga mei he Ha’a Tu’i Tupou ‘o e ‘aho ni. Pea kuo tau ‘ataa kotoa kiate kinautolu. Pea ne teunga’aki ‘a e lanu ‘uli’uli ko e fakafofonga ‘o e fonua, mahina, po’uli mo e fefine pehe ki he lanu kulokula ki he langi, la’a, ‘aho mo e tangata.
‘Oku tau kei lavengamonu he ‘aho ni honau momona, ‘a ia ‘oku fakamohe mei ‘ulu he mohenga ‘o e manumanumelie mo napangapangamalie, ‘o fioloto’aki ‘a e faka’ofo’ofa ne faka’ali’ali ma’u he Katoanga ‘Inasi. ‘Oku tatau e lau fakamamani lahi ‘e taha mo e lau faka-Tonga ki he faka’ofo’ofa, ‘ona fakatou taukave’i ko e FIEFIA MAFANA ‘O E LOTO ‘i he anga fakatoukatea mo potupotutatau.
‘Oku fakafotunga mai he Faka’ali’ali ni ‘etau ‘u kupesi ‘oku makehe fakalotofonua he uho hange ko e Pangaikafa, Potua-Manuka, mo e Aotapu; mo e ni’ihi ‘oku tau fe‘inasi’aki tatau ai mo e ngaahi sivilaise motu’a hange ko e Fata-‘oe-Tu’i Tonga, Manulua, Amoamokofe mo e Kauikalilo (pe Humu). ‘Oku to e tatau ‘etau ngaahi kupesi ‘i he fuo hono fakafehoanaki mo e fuo ‘o e ngaahi kupesi ‘iloa ‘a mamani. Ka e kehekehe fakaeuho pe fakaikiiki.  Sinoeme’a, ‘oku malava he Faka’ali’ali ni ‘o fakamanatu mai kuo ‘osi tatatau fufu ‘a e manava mo e ivi mo’ui ‘o ‘etau lotu mo e siviliaise mei ono’aho ki onopo he fuo mo e uho ‘o e ‘u kupesi.
‘Oku ‘i ai ‘a e fakatauange ‘e lava he Faka’ali’ali ni ‘o fangufangu ‘a e Ha’a mo fafangu kitautolu kotoa ketau to e mahu’inga’ia ange ‘i ha’atautolu, pea neongo ‘a e ngaahi faka’ofo’ofa, lelei mo e tolonga ‘oku tau fe‘inasi’aki ai mo mamani, ka ‘oku ai pe hotau makehe’anga kuo tatatau fufu he’etau ngaahi kupesi. Fakamanatu mai heni ‘a e tofolofola e La’a Kuo Unga Fonua, Ta’ahine ko Kuini Salote Tupou III, na’e to folofola ‘o pehe, “Na’a tau ha’u mei fe ‘i he Tala ‘o Tu’i Tonga ‘Ahoeitu”, pea tali mai, “Mei Langi”, pea to e folofola mai, “Pe’i mou puke ma’u hotau Tala ko ia. Na’a tau omai mei Langi, pea ko hotau makehe’anga ia”.


FAKAFETA’I E MA’U FAINGAMALIE ‘OFA LAH ATU